– Гы, прыкольна…

…..

– Пайшлі лягушку зловім!

– На халеру?

– Ну, ты тормаз! Яе ж надзьмуць можна! Яна тады плавае паверху, а нырнуць не можа. Нырае і не можа. Нырае – і не можа!

– Прыкольна як!

…….

– Ты ведаеш, навошта кошцы хвост?

¬– Ну?

– Яна заўсёды на лапы падае, але калі хвост ёсць.

– Тачняк?

– Ну, чаго мне гнаць? Учора праверылі: кідалі Моціка маёй сястры Анькі з трэцяга паверха – на лапы заўсёды! А я потым яму хвост сякеркай кухоннай адсек – ён на спіну гэпнуўся!

– Ух ты, крута! А кот жывы?

6

Дзіўна, але ўсе хваляванні зніклі, як іх не было, калі сеў за камп’ютар. Зноў тыя самыя жывыя людзі на беразе сталі звычайнымі кадрамі, з якімі трэба было працаваць: нейкія выразаць, каб не было надта зацягнута, нешта і месцамі памяняць… Працаваў гадзіны дзве, запусціў праграму перазапісу фармату – яна доўга працуе, пайшоў на кухню гатаваць сабе чаго папіць.

Бацька глядзеў баявік – Сціван Сігал у галоўнай ролі. Віктар любіў гэтага акцёра і фільмы яго (ён жа і рэжысёр яшчэ). Гэткі твар непранікальны, мужны. А позірк… Ды і фільмы цікавыя. Прысеў і сам на канапу, хоць фільм гэты ўжо глядзеў.

– Ідзі ў маці папытайся, мо яна гарбату будзе, – сказаў бацька.

Маці ад гарбаты не адмовілася – яна глядзела свой чарговы серыял. Віктар згатаваў, паклікаў. Якраз была рэклама, і маці прыйшла на кухню.

Трафік (траф) – колькасць прынятай ці перададзенай інфармацыі ў Інтэрнэце. Таксама колькасць наведвальнікаў (юзераў) таго ці іншага рэсурса (сайта).

Адалт – усё, што звязана з «дарослымі» тэмамі ў Інтэрнэце: эротыка, секс, парнаграфія. Адалт-трафік – частка карыстальнікаў рэсурса, якая свядома выбірае накірунак адалта.

Канвертаваць – накіроўваць частку карыстальнікаў са свайго рэсурсу на той, дзе юзер патраціць свае грошы, а гэта прынясе табе нейкі прыбытак у выглядзе працэнтаў ад патрачанага.

Канверт – доля карыстальнікаў, якіх удалося канвертаваць.

Крэатыў – тут: новае, нечаканае, арыгінальнае, цікавае, незвычайнае, што выклікае агульную цікавасць.

ІР – спецыяльны індэкс, які прысвойваецца кожнаму камп’ютэру пры выхадзе ў Сеціва. Можа быць дынамічны, г.зн. кожны раз новы пры заходзе-выхадзе; статычны – пастаянна прысвоены пры асаблівых падключэннях да Сеціва. Па ІР звычайна можна вызначыць прыналежнасць камп’ютэра да рэгіёна, горада…

Банер – рэкламны малюнак, з дапамогай якога канвертуюць юзераў.

Жэнька неспадзявана адчуў, што стаў сведкам таго, на што яму глядзець не трэба. Але прага бачыць новае перасіліла жаданне ўцячы – і ён застаўся назіраць з-за скалы за тым, як пры дапамозе механізмаў дарослыя людзі здымалі чорныя пліты, адкрываючы Купал ля Трубы Смерці. Адначасова да Купала пераносіліся новыя, бліскучыя пліты. Што ж, усё зразумела – Цемра хоча уварвацца ў іх дом, яна грызе Купал, трэба час ад часу мяняць ахоўныя пліты. Ну, вось, гэта вельмі цікава ведаць і можна будзе расказаць на ўроку, зарабіць падзяку ад Настаўніка.

Дзіўна толькі, што Купал за гэтымі плітамі заставаўся такі ж белы, як і іншых месцах. Адно што Цемра пакінула на ім сляды… Шэрыя…

Жэнька углядаўся у гэтыя сляды Цемры, якія роўна віліся акурат над Трубой, і раптоўна зразумеў, што гэта – нейкія знакі. Як надпіс…