Нарадзіўся на гомельшчыне, у пасёлку Осава ў 1963 годзе, у вясковай сям'і.

Вучыўся ў Балатнянскай сярэдняй школе, потым - у Мінскім электратэхнікуме сувязі (цяпер - каледж сувязі). Працаваў майстрам у вучылішчы ў Казахстане, служыў у арміі. Пасля - работа на мінскім "Інтэграле".

У 1992 годзе пераехаў з сям'ёй у Івацэвічы. Тут працаваў на заводзе.

У гэты час стаў пісаць прозу. Першае сур'ёзнае апавяданне надрукавала "Маладосць" - "Абсалютнае жаданне". Часопіс "Крыніца" надрукаваў дэтэктыў на рускай мове "…И два в остатке". Невялікія карацелькі друкаваліся ў газетах.

Магчыма, і не стаў бы гэтага рабіць - збіраць сам у адну кучу свае творы, каб вынесці іх на ўсе вочы. Ды яшчэ улічваючы тое, што частка твораў не пазнала сустрэч з рэдактарскім і карэктарскім алоўкамі.

Мо так і надалей трэба рабіць: несці рукапіс у выдавецтва, і няхай ён там ляжыць - аж таго часу, пакуль не пажоўкне папера. Бо сёння выдавацца - як беднаму жаніцца.